Brief Gezaghebber di Boneiru

Apresiabel suidadano(nan),

E último añanan Boneiru a kambia masha hopi. Na aña 1957 Boneiru tabatin 5663 habitante. Aktualmente nos isla tin 20.488 habitante. E kantidat di outo na Boneiru tambe a oumentá konsiderablemente. Na aña 1957 tabatin mas o ménos 250 outo i tres motosaikel na Boneiru. Awor aki tin 15.696 outo na Boneiru. En total tin 1.816 skuter, motosaikel i ‘quad’.

Na aña 1957 e lei di tráfiko pa Boneiru, esta ‘Wegenverkeersverordening,’a bini na vigor. Despues di esei nos poblashon i partisipantenan na tráfiko a krese supstansialmente. A bira tempu pues pa un adaptashon di reglanan di tráfiko. P’esei a remplasá e lei bieu di tráfiko di 1957 ku un nobo. E reglanan nobo ta nesesario pa garantisá siguridat di tur hende den tráfiko. Dia 1 di ougùstùs 2019 e reglanan nobo ta bira vigente.

Semper suidadanonan tin ku kustumbrá ora tin kambio den reglanan importante. P’esei polis, Ministerio Públiko i ami a disidí ku ta bini un periodo di transishon pa e reglanan ku tin aki bou. Den e periodo di transishon ta trata di e siguiente reglanan:

*Bo no tin mag tene un telefòn selular den bo man ora bo ta kore outo

*Tur hende den outo mester mara e faha di siguridat

*Mucha te ku tres aña mester sinta den un stul spesial pa mucha den outo

*Koredónan di skuter, motosaikel i ‘quad’ mester bisti hèlm

For di 1 di ougùstùs te 1 di òktober polis ta hala bo atenshon si bo no tene bo mes na e reglanan nobo aki. E ora ei ainda bo no ta haña but. For di 1 di òktober si bo ta haña un prosèsvèrbal si bo no tene Bo mes na e reglanan.

*Tantu den lei bieu di tráfiko komo den esun nobo ta kastigabel pa stür bou di influensia di alkohòl. E diferensia ta ku polis ku e lei nobo por kontrolá mas fásil si un hende a bebe alkohòl. Si bo a bebe alkohòl ta mihó bo no stür. Si bo hasié tòg na momentu di kontròl bo ta haña un but si bo a bebe di mas.

Mi ta konta ku boso ta tene boso mes na e reglanan nobo. Al final ta trata di siguridat di nos tur. Siguridat di nos yunan, nos famia, amigu i konosínan i turistanan na Boneiru. I ta p’esei nos ta hasié.

Gezaghebber di Boneiru

Edison Rijna